حامد افغان
حُيَيُ بن أخطب مدینه منوره کې د یهودو د بنوالنضیر قبیلې خان او سرخېل و او همدا حُيَيُ د رسول الله صلى الله عليه وسلم خسر و، د ام المؤمنین صفيَّة بنت حُيي رضي الله عنها پلار و، د ده یو بل ورور ابو یاسر بن اخطب نومیدی، دوی دواړو ته د رسول الله ﷺ نبوت ثابت شوی وو، خو له کبر او سرټمبګي یې د هغه نبوت نه مانه، په دې اړه پخپله د حیي لور صفیة رضي الله عنها د دوی کیسه کوي.
ام المؤمنین صفیة بنت حیي وایي: په ټولو خوېندو او وروڼو کې زه خپل پلار او زما تره ابو یاسر ته ډېره ګرانه وم، زه به چې هر وخت دوی دواړو سره مخامخ شوم، که کوم بل ماشوم به ورسره و، هغه به یې لری کړ او زه به یې ورواخیستلم. کله چې رسول الله ﷺ مدینې منورې ته راغی، قباء کې د بنو عمرو بن عوف مېلمه شو، سبا د سهار په خړه کې زما پلار حُييُّ بن أخطب او زما تره أبو ياسر بن أخطب ورغلل.
صفیة رضي الله عنها وایي سهار وختي چې زما پلار او تره ورغلل؛ ماښام لمر لوېدا مهال بېرته راغلل، دوی دواړه سخت ستړي وو، زه له عادت سره سم مخته ورغلم، خو والله که یوه هم راکتلي یي، ځکه دواړه سخت غمژن غوندې وو، صفیة زیاتوي: ما واوریدل چې تره مې پلار ته ویل: دا هماغه محمد و چې زموږ کتابونو کې د هغه د راتګ زېري راغلي دي او موږ ورته انتظار وو؟! پلار مې ورته وویل: په الله قسم کوم، دا هماغه محمد دی!!
ابو یاسر ورته وویل: هغه دې وپېژاند او پیغمبري یې هم درته ثابته شوه؟ حیي بن اخطب ورته وویل: هوکې، ابو یاسر ورته وویل: نو زړه کې دې څه دې، د هغه په اړه څه پرېکړه کوې؟ حیي ورته وویل: په الله مې قسم، تر څو چې ژوندی یم دښمني به ورسره کوم.
مأخذونه:
سيرة ابن هشام (1: 517)
عيون الأثر؛ لابن سيد الناس (1: 277)
الروض الأنف؛ للسهيلي (2: 376)
ناشر:أبي بن کعب مدرسه.کام
